करमां रौ लेखो!

करमां रौ लेखो!
by Vinod Saraswat on Saturday, 16 October 2010 at 11:20 {from facebook}

जमपुर रौ दरबार सज्यौ,

करमां रौ लेखौ लेवण नैं।

तीन छंटैल आय खड़या,

म्यानौ अपणौ देवण नैं।।



जमराज कहै सुण कान खोल,

अठै कूड़-कपट चालै कोनी।

नीं चालै कोई सांम-दांम,

इणसूं ऊंची कचैड़ी कोनी।।



तीनूं छंटैल दे मूंछया मरोड़,

अेके साथै फुंफकार करी।

म्है उण धरणी रा पूजनीक,

लावण री हिम्मत किंया करी।।



मंतरी-संतरी म्हारा हाजरिया,

कलैक्टर, एस. पी. निवण करै।

पढणियां म्हारा पाठ पढै,

कलम रा धणी बखाण करै।।



तांबा-पतरी लिख्या सज्या,

सगळा वांरी साख भरै।

दुनिया देखण रौ पट्टो है,

औ आणंद थारै क्यूं अखरै।।



राजसी संनमान सूं उठी अरथी,

अणगिणिया पुसब-चक्र चढया।

इक्कीस तोपां री सलामी,

जैकारै सागै जुलस कढ्या।



अखबार मीडीया सगळा तरसै,

चितराम छेकड़ला लेवण नैं।

नेता-अफसरां रा नैण झुरै,

दरस छेकड़ला पावण नैं।।



म्हारी इण महाजातरा सूं,

घर वाळा घणा हरख रैया।

ओ देख राजसी ठाट-बाट,

बै चमगूंगा सा होय रैया।।



चितराम चालता सैमूंडै,

निजरां पण धोखो खावै ही।

औ बूढल्यौ इयां जासी,

आ सोच’र भंवळा आवै ही।।



निबीयै सूं पैली जलम्यौड़ा,

दांत औजूं भी खिर् या कोनी।

रजपूती राज सूं लड़या-भिड़या,

आजादी में कसर राखी कोनी।।



इतरौ सुण जमराजा करी हाकल,

थै तीनूं म्हारै सूं कोनी छाना।

थांरी इसीजी रपटां कनै पड़ी,

म्हैं खोलूं अब बीं रा पांना।।



थे तीनूं ई हो करमहीण,

कूड़ी ई धजा फरूकावौ।

खा फोकट री हाड-हराम बण्या,

ऊंचौ आसण किण बिध पावौ।।



जै चावौ थै जुगती-मुगती,

कपट गांठ खोलणी पड़सी।

जे कूड़ बोलसो अब भी थे,

तो लख चौरासी भोगणी पड़सी।।



होडा होड मची तीनां में,

पैली म्हैं, री रट लगावै हा।

अेक दूजै री पोलां खोलण,

बूकिया ऊंचा चढावै हा।।



साईना हा तीनूं छंटैल पण,

कीं दिनां-महीनां री छेती ही।

चतरो, पेमो ऊदो खड़्या,

पैली चतरौ बोलण री चेती ही।।



म्है तो हो छोटो-सो टाबर,

नाड़ौ ई कोनी संभतौ हो।

आजादी के ठा के होवै।

म्हैं तो गळियां में भमतौ हो।।



लगलगी लगाई कुण म्हारै,

म्हनैं इण रौ ग्यान नहीं।

धिंगाणै पुलिस पकड़ लियौ,

म्हनैं तौ कीं भी ध्यान नहीं।।



पुलिस पकड़यो अर जंतरायौ,

पण दो दिन पछै छोड दियौ।

केई नेता म्हनैं पोमायौ,

आजादी सांमी मोड़ दियौ।।



मनड़ै में लाडू फूटै हा,

जेळ-कचैड़ी घर लाग्या।

जवानी हेला मारै ही,

दूजा सगळा ओछा लाग्या।।



चक्कू छूरा लै हाथां में,

सेठां नैं माडै धमकातो।

धाप’र लूंट-खसूंट करी,

माडाणी मांगां मनवातौ।।



सांडाई नित बधती जावै,

लोगड़ा घणा कसमसावै।

थाणै में मुकदमा करावै,

रळ-मिल म्हनैं कुटावै।।



जेल रै इण नातै सागै,

देस आजाद हुयग्यौ।

मुकदमा आजादी भेळा रळग्या,

म्है तांबा पतरधारी बणग्यौ।।



साथीड़ां भैळी म्हारी,

तीन पीढ़यां तिरगी।

बांट-बांट खायौ म्है,

मती सगळी फुरगी।।



ओ साच आज परगाास्यौ है,

म्हनैं लोगड़ा माथै चढायौ।

धिंगाणै थुल्डायौ,

माल-मलीदो रूच-रूच खायौ।।



पेमो ऊदो तावळा हुय,

अेक साथै बोल पड़्या।

चतरै री बातां खरी है,

म्है भी लारै टुर पड़्या।।



म्है भी हाको-हाक मचाई,

रबड़ी-रसमळाई सागै खाई।

अेकर जेळ री हवा खाई,

पछै साख बधी सवाई।।



कहै जमराज सुणौ छंटैला,

म्हनैं फरज निभाणौ पड़सी।

बरस साठ पूजीज्या धरणी पर,

अबै फिटकार झेलणी पड़सी।।



विनोद सारस्वत,

बीकानेर.